શક્યતાનું ઢાંકણ

જાઓ જો કદીક શબ્દોનાં કટકા કરી રસોડામાં,

વિચારોના મસાલિયામાં ભેળ-સેળ રંગો મળે,

કેમેય કરીને જામતું નથી આ મહીં-દિલ,
થોડુંક વલોવાતું ને પછી ખાટી છાશ મળે !

સંબંધોના ફ્રિજમાં ડોકિયું કરો સહજ,
અકબંધ - અવનવાં રંગમાં લોકો મળે,

હાથ ફેલાવો તાજા શાકની આશમાં,
બરફ આડે થીજેલા વાસી ભાત મળે !

મજલ 'કાપવાનું' શરૂ કરો ક્યાંકથી ને,
ચપ્પુ પર લોહીની અમથી ધાર મળે,

સમારતાં ડુંગળીની તીખી યાદો,
ખબર ન પડે કોઇને, એમ રડવાનું કારણ મળે!

'છ્મ્' કરતો વઘાર ને ધુમાડો ગુંગળાય,
ન કરે યાદ કોઇ, ને અચાનક ખાંસી મળે !

બે-ચાર ચીસો સંભળાય દિલનાં કુકરમાંથી,
હોંશે ખોલે શક્યતાનું ઢાંકણ 'મેહુલ',
.... ને આંધણ સહુ કાચા મળે !